လၢဝ်ယွတ်ႇ ၾူၼ်လၢဝ်ယွတ်ႇ။

မိူဝ်ႈႁဝ်းတိုၵ်ႉပဵၼ်လုၵ်ႈဢွၼ်ႇ ပေႃးၶိုၼ်းလႂ်တွင်ႉၾႃႉပၢင်ႇသႂ်လီ ဢမ်ႇမီးၽႃႈၾူၼ်ၼႆၸိုင် ၵႆႉၼွၼ်းလဵၼ်ႈၸွမ်းၵၢင်ၸၢၼ်းႁိူၼ်းႁဝ်း ၼၼ်ႉမုင်ႈတူၺ်းၶိုၼ်ႈၼိူဝ်တွင်ႉၾႃႉ ၵႆႉလႆႈႁၼ်ၶီႈလၢဝ်ယွတ်ႇ လၢဝ်ယွတ်ႇ မၢင်ၶမ်ႈၼႆၵေႃႈၼပ်ႉပေႃးဢမ်ႇလႆႈ မၢင်ၶမ်ႈၵေႃႈႁိုင်ႁိုင် ၸင်ႁၼ်လုၵ်ႈၼိုင်ႈ။

ပေႃးပဵၼ်လုၵ်ႈဢွၼ်ႇၵူၺ်းၵေႃႈဢမ်ႇႁူႉသင် ႁၼ်လၢဝ်ယွတ်ႇမၢင်ပွၵ်ႈၵေႃႈဢဝ်ပဵၼ်တူၵ်းၸႂ် ထၢင်ႇဝႃႈၾႃႉၽီ ၽၢၼ်ႇႁႂ်ႈပဵၼ်မႃး မၢင်ပွၵ်ႈ ၺႃးႁူၺ်ႇယႂ်ႇၼႃႇထၢၼ်ႈပေႃးတၢၼ်ႇမၢၵ်ႇၽႃႈ မၢၵ်ႇဢူဝ်းၵေႃႈမီး။

ယႂ်ႇမႃးၵႃႈသုင် လႆႈႁူႉ လႆႈလဵပ်ႈႁဵၼ်းၸွမ်းၽိုၼ်လိၵ်ႈၽိုၼ်လၢႆး တၢင်းႁူႉၼၼ်ႉၵေႃႈႁဵတ်းႁႂ်ႈပွင်ႇၸႂ်ၸွမ်းလွင်ႈ သၽဝမၼ်း လွင်ႈၵိူတ်ႇ တေႇပဵၼ်မႃးမီးမႃး ဢဝ်ပဵၼ်လွင်ႈလဵပ်ႈႁဵၼ်းၶႂ်ႈႁူႉၶႂ်ႈႁၼ်ပဵၼ်တၢင်းႁူႉၵႅမ်တူဝ်ၵႂႃႇ။

လၢဝ်ယွတ်ႇ ဢမ်ႇၼၼ်ႁွင်ႉၶီႈလၢဝ်ယွတ်ႇပဵၼ်သင် လုၵ်ႉတီႈလႂ်မႃး?
ၶီႈလၢဝ်ယွတ်ႇၼၼ်ႉပဵၼ်ၸၢၵ်ႇလၢဝ်ဢၼ်ၽူင်ႉၽိုၼ်ဝႆႉၼိူဝ်ပၢင်ႇလၢင်ႉၵၢင်ႁၢဝ် ၵမ်ႈၼမ်တေၸၢင်ႈပဵၼ်ၸၢၵ်ႇ လၢဝ်ႁၢင်ဢၼ်လိူၼ်ႈ ၽၢတ်ႈပၼ်ႇတူင်ႇႁွပ်ႈလုၵ်ႈၵၢင်ဝၼ်းဝႆႉယဝ်ႈ ပေႃးလၢဝ်ႁၢင်ၽၢတ်ႈပၼ်တူင်ႇႁွပ်ႈလုၵ်ႈဝၼ်း သဵၼ်ႈတၢင်းဢၼ်မၼ်းပၼ်တူင်ႇၵႂႃႇၼၼ်ႉ မၼ်းၸၢင်ႈပႅတ်ႈဝႆႉၸၢၵ်ႇဢွၼ်ႇမၼ်းတၢၼ်ႇမဵတ်းမၢၵ်ႇႁိၼ် မၢၵ်ႇသၢႆး မိူဝ်ႈလႂ်လူၵ်းႁဝ်းဢၼ်ပၼ်ႇႁွပ်ႈလုၵ်ႈဝၼ်းၼင်ႇၵဝ်ႇၵႂႃႇၶွႆႈၽၢတ်ႈ ဢၼ်ႁွႆးလၢဝ်ႁၢင်ယၢမ်ႈပၼ်တူင်ႇ မၼ်းၸၢင်ႈၸၼ်လုတ်ႇဢဝ်ၶီႈလၢဝ်ၼၼ်ႉတူၵ်းလူင်းမႃးၼိူဝ်ပိုၼ်ႉၼင်လိၼ်လူၵ်ႈႁဝ်ႈလႆႈ ၸၢၵ်ႇၾုၼ်ႇ ၸၢၵ်ႇ မၢၵ်ႇႁိၼ် မၢၵ်ႇသၢႆးၸိူဝ်းၼၼ်ႉ သင်ဝႃႈမၼ်းၺႃးၸၼ်ၶဝ်ႈမႃးၽႃႇသႂ်ႇလူမ်းဢၼ်ႁေႃႇလူၵ်ႈႁဝ်းဝႆႉ မၼ်းၸၢင်ႈလုၵ်ႉပဵၼ်ၾႆးလႆႈ ၵွပ်ႈဝႃႈမၼ်းလႅတ်ႈၽၢႆၼႃႇလႄႈမၼ်းၸင်ႇလုၵ်ႉလႆႈမိူၼ်ၾႆး ပေႃးႁူၺ်ႇလဵၵ်ႉတၢၼ်ႇမဵတ်ႉမၢၵ်ႇသၢႆး ,ႁဝ်းၸၢင်ႈႁၼ်ိမၼ်းလုၵ်ႈပဵၼ်ၾႆး ပဵၼ်သၢႆၾႆးမၢပ်ႈႁိူဝ်ႈလူင်ၵႂႃႇပဵၼ်သဵၼ်ႈ မၢင်ႁူၺ်ႇသင်ဝႃႈမၼ်းလုၵ်ႈယႂ်ႇၼႃႇဢႃးလႃးဢမ်ႇၸၢင်ႈမႆႈသဵင်ႈလႄႈ မၼ်းၸၢင်ႈတူၵ်းလူင်းမႃး ထိုင်ၼင်လိၼ်ၼိူဝ်လူၵ်ႈႁဝ်းလႆႈ ၵႂၢမ်းတႆးႁဝ်းတေႉတေႁွင်ႈဝႃႈႁိုဝ်ဢမ်ႇႁူႉ ၵႂၢမ်းထႆးတေႉဝႃႈ ဢုၵ်ႇၵႃးၿၢတ်ႇ อุกกาบาต။

ၾူၼ်လၢဝ်ယွတ်ႇ ၶီႈလၢဝ်ယွတ်ႇၸွမ်းၵၼ်ၼမ်ၼမ်။
မီးထႅင်ႈလွင်ႈၼိုင်ႈဢၼ်ပဵၼ်သၽဝၶီႈလၢဝ်ယွတ်ႇၼင်ႇၵဝ်ႇ ၵူၺ်းၵႃႈမၼ်းဢမ်ႇယွတ်ႇၵမ်းလုၵ်ႈသွင်လုၵ်ႈၵူၺ်း ၵူၺ်းၵႃႈမၼ်းတေ ယွတ်ႇလူင်းၽွမ်ႉၵၼ်ၼမ်ၼမ်ၵမ်းလၢႆလုၵ်ႈ မၢင်ပွၵ်ႈယွတ်ႇလူင်းမႃးငၢႆးမိူၼ်ၼင်ႇၾူၼ်တူၵ်းပဵၼ်ႁႃႇ ဢၼ်ၼႆႉႁဝ်းတေႁွင်ႈၸိုဝ်ႈ မၼ်းဝႃႈ ၾူၼ်လၢဝ်ယွတ်ႇ၊ ဢၼ်မၼ်းယွတ်ႇလူင်းမႃးၼမ်ၼမ်ၼႆႉပဵၼ် ယွၼ်ႉၵွပ်ႈဝႃႈသဵၼ်ႈတၢင်းဢၼ်လူၵ်ႈႁဝ်းပၼ်တူင်ႇၵႂႃႇၼၼ်ႉ ၵႂႃႇၶွႆႈၺႃးမႅၼ်ႈသဵၼ်ႈတၢင်းဢၼ်ပဵၼ်လၢဝ်ႁၢင်ယၢမ်ႈလတ်းၽၢတ်ႈလုၵ်ႈဝၼ်း ယဝ်ႉၵေႃႈမၼ်းပႅတ်ႈၸၢၵ်ႇမၼ်းဝႆႉၼမ် မၢင်ပီပီၸၢင်ႈ ႁၼ်မၼ်းယွတ်ႇပဵၼ်သဵၼ်ႈပဵၼ်သၢႆဢမ်ႇထၢတ်ႇဢမ်ႇဝၢႆး။

ၸူဝ်ႈၶၢဝ်းဢၼ်ႁဝ်းတေတူၺ်းလၢဝ်းယွတ်ႇဢၼ်တေႁၼ်လီသုတ်းၼၼ်ႉ တေႇၶၢဝ်းၵတ်းၵႂႃႇႁွတ်ႈထိုင်ၶိင်ႇမႆႈ ၵွပ်ႈဝႃႈတွင်ႉၾႃႉဢွၼ်ႇ ၵေႃႈပၢင်ႇသႂ် ဢမ်ႇမီးၽႃႈၾူၼ်သင်။

ၼႂ်းၸူဝ်ႈဝၼ်တီႈ 16-18 လိူၼ်ၼူဝ်ႇဝဵမ်ႇၿိူဝ်ႇ ၵူႈပီႊပီႊၼၼ်ႉ ႁဝ်းၸၢင်ႈႁၼ်လၢဝ်ယွတ်ႇတူၵ်းလူင်းမႃးၼမ်ၼမ် လႆႈ၊ ၼႆႉၵေႃႈၸမ် ဝၼ်းတီႈ 16 - 18 လိူၼ်ၼူဝ်ႇဝဵမ်ႇၿိူဝ်ႇ 2014 ယဝ်ႉ ၶႃႈႁဝ်းယွၼ်းၸူဝ်းဢဝ်ဢူၺ်းၵေႃႉႁဝ်းတၢင်းသဵင်ႈဝၢႆႇတူၺ်းလၢဝ်ယွတ်ႇဢၼ် တေတေႇပဵၼ်မႃးၸွမ်းၵၼ် မၼ်းမီးၸိုဝ်ႈဝႃႈ "ၾူၼ်လၢဝ်ယွတ်ႇလီးဢူဝ်း ၼိတ်ႇသ်" ပေႃးတေတူၺ်းၼႆၵေႃႈၶိုၼ်းဝၼ်းတီႈ 16 - 18 ႁႂ်ႈဝၢႆႇၵႂႃႇၾၢႆႇတၢင်းဢွၵ်ႇဢၼ်လၢဝ်ၵၢၼ်သၢမ်တႃႇတေႇဢွၵ်ႇမႃးၼၼ်ႉၶႃႈ တေတူၺ်းလႆႈၸဵမ်မိူဝ်ႈႁူဝ်ၶမ်ႈတေႃႇထိုင်ၵၢင်ၼႂ်ၵမ်းလဵဝ် ဢမ်ႇၼၼ်ၵေႃႈပေႃးဢမ်ႇပႂ်ႉတူၺ်းလႆႈတႃႇသေႇ သင်ဝႃႈလုၵ်ႉမႃးၵၢင်းၶိုၼ်း ၶိုၼ်းဝၢႆႇတူၺ်းတွင်ႉၾႃႉ ယူဝ်ၸၢင်ႈႁၼ်လၢဝ်ယွတ်ႇ ႁၢင်ႈလီ ထုၵ်ႇတႃႇမႅၼ်ႈၸႂ် ႁဝ်းတူၺ်းဢဝ်တၢင်းမူၼ်ႈတၢင်းၵျေႃႇ တၢင်းမူၼ်ႈၸႂ် ဢဝ်ပဵၼ်တၢင်းႁူႉၵႅမ်တူဝ်ၸွမ်း လမ်ႇလွင်ႈဢမ်ႇ လမ်ႇလွင်ႈပဵၼ်ထႅင်ႈလွင်ႈၼိုင်ႈ ယူဝ်ၸၢင်ႈလႆႈတၢင်းဝူၼ်ႉလီလီထႅင်ႈၵႂႃႇမိူဝ်းၼႃႈ။

မႂ်ႇသုင်ၶႃႈ။