ဝွၼ်ၵႅင် (ၿွၼ်ၵႅင်)

မႂ်ႇသုင်ၶႃႈ တူင်ႉတၵ်းၵၼ်ၼႂ်းဝၼ်းမိူဝ်ႈၼႆႉ မီးဢူၺ်းၵေႃႉႁဝ်းၼႂ်းၾဵတ်ႉၶႂ်ႈႁူႉလၢႆးႁဵတ်းၽၵ်း "ၽၵ်းဝွၼ်ၵႅင်" ၶႃႈ ၶႃႈႁဝ်းၵေႃႈၸွမ်းၼင်ႇဝႃႇသၼႃႇၵျိူၵ်ႈႁုင်ၶဝ်ႈႁဵတ်းၽၵ်းၵိၼ်ႁင်းၵူၺ်း ယူႇယဝ်ႉၶႃႈလႄႈ ၸင်ႇဝူၼ်ႉထိုင်ဝႃႈ သင်ႁဝ်းဢဝ်မႃးတႅမ်ႈတၢင်ႇၼိူဝ်ဢွၼ်ႇလၢႆးပၼ်ႉၵၼ် တေလီႁိုဝ်ဢမ်ႇႁူႉ ယူဝ်ႁေၵေႃႉႁေလႂ်ၶႂ်ႈၸၢမ်းႁဵတ်းၵိၼ် တူၺ်း ဝႃႈၼၼ်ၶႃႈ။

လၢႆးမၼ်းမၼ်းတေႉၵေႃႈဢမ်ႇယၢပ်ႇ လူဝ်ႇလႆႈမီးၵိရိယႃႇမၼ်းဝႆႉၸိူင်ႉၼႆၶႃႈ။

1...ဝွၼ် ၸိူဝ်းဢၼ်ဢမ်ႇၵေႇႁၢတ်းႁၢဝ်ႇၼၼ်ႉၶႃႈ သင်ပဵၼ်လီႇမၼ်းၵေႃႈလႆႈပႃးယူႇ
2..မၢၵ်ႇၽိတ်ႉႁႅင်ႈ
3...ထူဝ်ႇၼဝ်ႈၶႅပ်းၸီႇႁၢင်းၾႆး
4...ႁူဝ်ၶႃႇ
5...ၶႃးႁွမ်
6...မဵတ်ႉမၢၵ်ႇၽၵ်းၵီး သင်ဢမ်ႇမီးဢမ်ႇသႂ်ႇၵေႃႈလႆႈယူႇ
7...မီႇလႅင် မီႇႁေႃ
8...သူမ်ႈတႃႇသႂ်ႇၽျႅတ်ႈၶၼ်းမၼ်းၼၼ်ႉၶႃႈ ၸိူင်ႉၼင်ႇသူမ်ႈၶွပ်ႈၶႅပ်ႈ သူမ်ႈပူ မၢၵ်ႇၵႅင်း ၸိူဝ်းၼႆႉၶႃႈ။
9...ၼင်မူ ၼင်ဝူဝ်း ၼင်ၵၢႆး ၵမ်ႈၵျိူၵ်ႈ။

  

 ၺႃတေလိုမ်းပႃးမၢၵ်ႇၵႅင်းဢၼ်လမ်ႇလွင်ႈမၼ်းယဝ်ႉၶႃႈ။

လၢႆးႁဵတ်းမၼ်းၸမ်ႉ။

သႆႉဝွၼ်ဝႆႉထႃႈၸႃႉဢၼ်ပႆႇၵီႈမၼ်းၼၼ်ႉသႂ်ႇလႆႈတၢင်းမူတ်းယူႇၶႃႈ။

 ၵူၺ်းဝႂ်ၵေႇမၼ်းၼၼ်ႉႁႂ်ႈလႆႈသႆႉဢဝ်ဝႂ်မၼ်းၵူၺ်းၶႃႈ ၵမ်ႉမၼ်းတေယၢမ်ယေႇယၢမ်ယႃႇၼႃႇ။

သႆႉသိၵ်ႇဢဝ်ဝႂ်မၼ်း ဢမ်ႇဢဝ်ပႃးၵႅၼ်ႈမၼ်း ၵူဝ်မၼ်းဢမ်ႇပူၺ်ႇ။

 သႆႉယဝ်ႉဢဝ်ၵႂႃႇလၢင်ႉၼမ်ႉဝႆႉၶႃႈ။

ၵမ်းၼႆႉၵေႃႈၶဝ်ႈၼႂ်းသွင်ႇၾႆး ႁဝ်းမႃးႁဵတ်းၽၵ်းၸွမ်းၵၼ်။

တမ်မၢၵ်ႇၽိတ်ႉႁႅင်ႈ ၵိူဝ် ထူဝ်ႇၼဝ်ႈႁႂ်ႈၶဝ်ႈၵၼ် ပေႃးႁဵတ်းၼၼ်ယဝ်ႉၵေႃႈထွၵ်ႇသႂ်ႇမေႃႈ။

တမ်မဵတ်ႉမၢၵ်ႇၽၵ်းၵီး သင်ၸိူဝ်းဝႃႈဢမ်ႇမၵ်ႉဢမ်ႇသႂ်ႇၵေႃႈဢမ်ႇပဵၼ်းသင် ၵူၺ်းၵႃႈၶႃႈႁဵတ်းတေႉၶႃႈသႂ်ႇ ၶႃႈၵျိူၵ်ႈဢၢႆႁွမ်မၼ်းၶႃႈ။

ပေႃးဢွၼ်ႇလီယဝ်ႉၵေႃႈထွၵ်ႇသႂ်ႇမေႃႈထႅင်ႈၼင်ႇၵဝ်ႇ။

ၵမ်းၼႆႉၵေႃႈတမ်ၽၵ်းမီႇ ၽၵ်းႁေႃၸွမ်းၵၼ်ႁႂ်ႈဢွၼ်ႇ သင်မၼ်းဢမ်ႇဢွၼ်ႇပဵၼ်ယၢမ်ယႃႇၼႆၵေႃႈ ဢဝ်တၢင်ႇၼိူဝ်ၶဵင် ဢဝ်ၽႃႉၽၵ်ႉႁႂ်ႈမၼ်းလႅဝ်ၶႃႈ။

သွႆးၶႃးႁွမ်သေးသေး ယဝ်ႉၵေႃႈၶိုၼ်းၽၵ်ႉႁႂ်ႈလႅဝ် ဢမ်ႇၼၼ်တမ်ဢဝ်ၵေႃႈလႆႈ။

ႁူဝ်ၶႃႇၵေႃႈၼင်ႇၼၼ် သင်ၽၵ်ႉပဵၼ်ၶႅပ်းယဝ်ႉ ႁႂ်ႈဢဝ်ၽႃႉၽၵ်ႉႁႂ်ႈလႅဝ်ၽွင်ၼင်ႇၵၼ် တမ်ဢဝ်ၵေႃႈလႆႈယူႇ။

ပေႃးမၼ်းၽွင်လီယဝ်ႉထွၵ်ႇသႂ်ႇမေႃႈၵမ်းလဵဝ်။

ၵမ်းၼႆႉႁဝ်းမႃးၶိုင်ၼမ်ႉမၢၵ်ႇၵႅင်း တွၼ်ႈတႃႇတေႁဵတ်းသူမ်ႈၶၢတ်ႈၶၼ်းမၼ်းၶႃႈ သင်ၸိူဝ်ႉဝႃႈမီးၽၵ်းၶွပ်ႈၶႅပ်ႈ ဢမ်ႇၼၼ်သူမ်ႈပူၵေႃႈလႆႈယူႇ ၵူၺ်းၵႃႈၶိင်ႉႁႅင်ႈၼႆႉမၼ်းဢမ်ႇမီးႁႃႈယၢပ်ႇ ၶႃႈႁဝ်းဢဝ်မၢၵ်ႇၵႅင်းတၢင်တႅၼ်းဢဝ် ၼႆႉၵေႃႈလႆႈယူႇ ဝၢၼ်ယူႇၶႃႈ။

တင်ႈၼမ်ႉႁႂ်ႈလိူတ်ႇ ပွႆႇမၢၵ်ႇၵႅင်းသူမ်ႈလူင်းၵႂႃႇ။

ပေႃးၼမ်ႉလႄႈမၢၵ်ႇၵႅင်းလိူတ်ႇလီယဝ်ႉၵေႃႈ ၶိုၼ်းဢဝ်ၶိုၼ်ႈမႃးၼိုတ်ႈႁႂ်ႈမၼ်းလႅဝ်လႅဝ် ယဝ်ႉၵေႃႈၽိဝ်းဢဝ်ၼမ်ႉ သူမ်ႈမၼ်းၼၼ်ႉလူင်းမေႃႈၵႂႃႇ ၼမ်ႉမၢၵ်ႇၵႅင်းၼႆႉဢဝ်ၼမ်ႉသႂ်ႇၼိုတ်ႈဢဝ်သူမ်ႈမၼ်းလၢႆၵမ်းလႆႈယူႇ ပေႃးႁဝ်းဢမ်ႇႁဵတ်းၸိူင်ႉၼႆ ႁဝ်းဢဝ်မၢၵ်ႇၵႅင်းသႂ်ႇၵမ်းသိုဝ်ႈ မၢင်ပွၵ်ႈၵႆႉပဵၼ်ယၢမ်ယႃႇ ဢမ်ႇၼၼ်ၵေႃႈၶူပ်းသႂ်ႇ မၼ်းသူမ်ႈပဵၼ်တီႈပဵၼ်တီႈလႄႈ ၶႃႈၸွင်ႇႁဵတ်းၸိူင်ႉၼႆ။

ၵမ်းၼႆႉၵေႃႈဢဝ်ၼင်မူ ၼင်မၵ်းသႂ်ႇလူင်းၵႂႃႇ ၵူၺ်းၵႃႈမၼ်းဢမ်ႇမီးလႄႈ ၶႃႈႁဝ်းဢဝ်ၶႅပ်ႈမူ ၼင်ပွင်းၼၼ်ႉသႂ်ႇ တၢင်တႅၼ်းၵႂႃႇၶႃႈ။

ဢဝ်ၶိုၼ်ႈတင်ႈၼိူဝ်ၽီးၾႆး ဢဝ်ၼမ်ႉလွင်သႂ်ႇမွၵ်ႈၵွၵ်းသွင်ၵွၵ်းၵူၺ်းၶႃႈ သင်သႂ်ႇၼမ် ၼမ်ႉမၼ်းၼၢၼ်းႁႅင်ႈၼႃႇ သႂ်ႇဢေႇၵေႃႈၵူဝ်မၼ်းဢမ်ႇသုၵ်း ႁႂ်ႈမၼ်းလႆႈၼိုင်ႈပုၼ်ႈသၢမ်ပုၼ်ႈ 1/3 တူဝ်မၼ်းၵေႃႈလႆႈယူႇ။

ဢုပ်ႉၽႃမေႃႈၽၵ်းဝႆႉ တင်ႈၾႆးႁႂ်ႈမၼ်းလိူတ်ႇ။

ပေႃးမၼ်းလိူတ်ႇယဝ်ႉၶျေႃႉၾႆးမၼ်းလူင်းဢိတ်းၼိုင်ႈ ပေႃးၾႆးႁႅင်းၵမ်ႉမၼ်းတေၶႅမ်ႈဢွၼ်တၢင်းတေသုၵ်း။

သင်ဝႃႈမၼ်းလိူတ်ႇတၢၼ်ႇမၼ်းယဝ်ႉ ၼမ်ႉမၼ်းၵေႃႈၸမ်ႁႅင်ႈမႃးယဝ်ႉၼႆၸိုင် ႁႂ်ႈၶျေႃႉၾႆးမၼ်းလူင်းထႅင်ႈ ႁႂ်ႈမၼ်းလုၵ်ႉဢိတ်းဢိတ်းၵူၺ်း။

ၵႆႉၶူၼ်း ၵႆႉတူၺ်း ၸူဝ်ႈၶၢဝ်းၼႆႉသင်ဝႃႈၸၢင်ၵိူဝ် ၸၢင်သူမ်ႈ ၸၢင်သင်ၵေႃႈထႅင်ႈလႆႈယူႇ ပႂ်ႉတူၺ်းလွႆးလွႆး ၵူဝ်မၼ်းၶႅမ်ႈ။

ၵမ်းၼႆႉၵေႃႈၶႂ်ႈႁႅင်ႈလီယဝ်ႉ ၵေႃႈပိၵ်ႉၾႆးမၼ်းလႆႈယဝ်ႉဝႃႈ သင်ဝႃႈၶႂ်ႈၵိၼ်ယဝ်ႉၼႆၵေႃႈၵိၼ်လႆႈယူႇ ႁဝ်းတေႁွင်ႉဝႃႈ ဝွၼ်ၵႅင် သင်ၸိူဝ်ႉဝႃႈၶႂ်ႈဢဝ်ၵႂႃႇလၢမ် ၵႂႃႇဢႅပ်းသႂ်ႇတွင်ထႅင်ႈၼႆႉၵေႃႈလႆႈယူႇ။

ႁႂ်ႈလႆႈၵိၼ်ၽၵ်းလီ ၽၵ်းဝၢၼ်ၵၼ် ၵႅင်ယဝ်ႉယႃႇပေၶၼ်းသေၵမ်း။

မႂ်ႇသုင်ၶႃႈ။

ၶမ်းၸိင်ႇ လၢင်းၶိူဝ်း။