လွင်ႈထူင်ယၢင်ၽလၢတ်ႉသတိၵ်ႉ

မိူဝ်ႈလဵဝ် မုင်ႈဝၢႆႇတူၺ်းတၢင်းလႂ်ၵေႃႈႁၼ်ၵူၼ်းၸႂ်ႉတိုဝ်းထူင်ယၢင်ၽလၢတ်ႉသတိၵ်ႉၵၼ် ၼမ်လူင်လၢင်လႄႈ ၵႂႃႇလေႇတၢင်းလႂ် ၵႂႃႇသိုဝ်ႉၶွင်တၢင်းလႂ်ၵေႃႈဢဝ်ထူင်ၽလၢတ်ႉသတိၵ်ႉ သႂ်ႇပၼ်တိၵ်းတိၵ်း မၼ်းၼမ်လိူင်ႇလူင်လၢင် တီႈလဵၼ်ႈတီႈလေႇၵေႃႈၼင်ႇၼၼ် သမ်ႉပေႃး မၢၵ်ႇမိူဝ်ၵႂႃႇသဵင်ႈ ႁၢင်ႈႁၢႆႉတႃတေႉယဝ်ႈ ၵႂႃႇပွႆးလၢမ်းၶႅၼ်းၼမ် ပေႃးဢမ်ႇၸၢင်ႈႁၼ်တီႈ လိူမ်ႈလႆႇလႆႈ ၵူၼ်းၵဵပ်း ၵူၼ်းသိမ်းမၼ်းၵေႃႈဢမ်ႇတၼ်ႈၼိုင်ႇလႆႈ။

ၺႃးၵၼ်မိူဝ်ႈၼႆႉၶႃႈဢမ်ႇလႆႈပွင်ႉၶၢင်းၶႃႈ ၶႃႈလၢတ်ႈၼေၸွမ်းလွင်ႈတၢင်းဢၼ်မီး ဢၼ် ထူပ်းယူႇယၢမ်းလဵဝ် ၵူၼ်းႁဝ်းမိူဝ်ႈလဵဝ်ၸႂ်ႉထူင်ၽလၢတ်ႉသတိၵ်ႉၼမ်ပူၼ်ႉတီႈ ဢီႈသင် ၵေႃႈဢဝ်ထူင်ၽလၢတ်ႉသတိၵ်ႉသႂ်ႇတိၵ်းတိၵ်း ၸိူင်ႉၼင်ႇၶဝ်ႈၽၵ်းသုၵ်းၼၼ်ႉလႃႈ ၸွၵ်း ထွင်ၽလၢတ်ႉသတိၵ်ႉသေဝၢင်းၶၢႆ ဝၼ်းလႂ်ဢမ်ႇယိပ်းတူၺ်းထူင်ၽလၢတ်ႉသတိၵ်ႉၼႆႉ ဝၼ်းၼၼ်ႉပႆႇယဝ်ႉၵၢၼ် လႂ်လႂ်ၵေႃႈယူႇၵေႈမၼ်းယဝ်ႉလူး ႁဝ်းမႃးႁူႉၸၵ်းလွင်ႈထူင်ယၢင် ၽလၢတ်ႉသတိၵ်ႉၸွမ်းၵၼ်ၶႃႈ ယူဝ်ၸၢင်ႈလႆႈမီးတၢင်းသတိၽႂ်မၼ်း လႆႈတၢင်းႁူႉၵႅမ်တူဝ် ၵၼ်ဢိတ်းဢီႈ။

ပေႃးတေၸႅၵ်ႈလွင်ႈထူင်ၽလၢတ်ႉသတိၵ်ႉဢၼ်ႁဝ်းဢဝ်မႃးၸႂ်ႉတိုဝ်းယူႇၼႂ်းဝၼ်းမိူဝ်ႈၼႆႉ ဢၼ်ၸမ်တူဝ်ႁဝ်းၼႆႉ တေၸႅၵ်ႈလႆႈယူႇသၢမ်မဵဝ်းၸိူင်ႉၼႆၶႃႈ။

1. ထူင်ၽလၢတ်ႉသတိၵ်ႉၵတ်း "ထူင်ယဵၼ်" ႁဵတ်းဢဝ်မႃးတီႈၽူဝ်းလိဢေးထိလိၼ်းမဵဝ်း ၸိူဝ်းဢၼ်ဢမ်ႇပေႃးဢူၼ်ၼၼ်ႉ (LDPE) ၶႂ်ႈသႂ်သႂ်ဝႆႉ ဢူၼ်ႈဢူၼ်ႈဝႆႉ ယဝ်ႉၵေႃႈယိုတ်ႈလႆႈ ဢိတ်းဢီႈ ႁဝ်းၸၢင်ႈဢဝ်သႂ်ႇဢႁႃႇရတၢင်းၵိၼ် တွၼ်ႈတႃႇတေဢဝ်ၶဝ်ႈၸေႈၶႅင်ၼႂ်းတူႈယဵၼ် မၼ်းၶၢမ်ႇတၢင်းၵတ်းလႆႈ -70 ဢူင်းသႃၻီးၵရီးလႆႈ ၵူၺ်းၵႃႈ "ထူင်ယဵၼ်" ၼႆႉဢမ်ႇပေႃးၶႅမ်ႉ လႅပ်ႈတွၼ်ႈတႃႇတေဢဝ်သႂ်ႇမဵဝ်းဢၼ်မၼ်းမၼ်း ၼမ်ႉမၼ်း ၸိူဝ်းၼႆႉလႆႈထႅင်ႈ မဵဝ်းၼိုင်ႈၸမ်ႉ။ 

2. ထူင်ၽလၢတ်ႉသတိၵ်ႉမႆႈ "ထူင်မႆႈ" မဵဝ်းၼႆႉၸမ်ႉႁဵတ်းဢဝ်မႃးတီႈၽူဝ်းလိၽူဝ်းၽိလိၼ်း (PP) ၶႂ်ႈသႂ်လိူဝ်ထူင်ယဵၼ် ၶႅင်ဢိတ်းၼိုင်ႈ ဢမ်ႇဢူၼ်ႈၸၼ်ငၢႆႈ ထူင်ၸိူဝ်းၼႆႉႁဝ်းၸၢင်ႈၸႂ်ႉတိုဝ်းဢဝ်မႃး သႂ်ႇမဵဝ်းဢၼ် မၼ်းမၼ်းလႆႈ သႂ်ႇၼမ်ႉမၼ်းၵေႃႈလႆႈယူႇ ယဝ်ႉၵေႃႈၸၢင်ႈဢဝ်သႂ်ႇမဵဝ်းဢၼ်မႆႈမႆႈလႆႈ မွၵ်ႈတၢၼ်ႇၼမ်ႉလိူတ်ႇ မၢင်ပွၵ်ႈၶဝ်ႈဝႃႈလႆႈထိုင် 100 ဢူင်းသႃၻီးၵရီးၵေႃႈလႆႈ ၵူၺ်းမၼ်းၶၢမ်ႇ တၢင်းၵတ်းလႆႈတႅမ်ႇသုတ်း 0 ဢူင်းသႃၻီးၵရီးၶႃႈၼၼ်ႉၵူၺ်းၶႃႈ။

3. ထႅင်ႈမဵဝ်းၼိုင်ႈပဵၼ်ထူင်ၽလၢတ်ႉသတိၵ်ႉ "ထူင်သွပ်ႉသႅပ်" ပဵၼ်ထူင်ၸိူဝ်းဢၼ်မီးတီႈတိဝ်ႈ မၼ်းၸွမ်း ၶႂ်ႈဢူၼ်ႈလိူဝ်ပိူၼ်ႈ မဵဝ်းၼႆႉပဵၼ်ထူင်ယၢင်ဢၼ်ယၢမ်ႈၸႂ်ႉမႃးယဝ်ႉ ယဝ်ႉၵေႃႈပိူၼ်ႈ ၶိုၼ်းဢဝ်မႃးသုၵ်ႈသီ ယဝ်ႉၵေႃႈဢဝ်မႃးဢွင်ႇႁဵတ်းထူင်တႃႇတေၸႂ်ႉတိုဝ်းထႅင်ႈ မဝ်ႇလီဢဝ်မႃး သႂ်ႇၶဝ်ႈသႂ်ႇၽၵ်းၵမ်းသိုဝ်ႈ ၵမ်ႈၼမ်ပိူၼ်ႈတေဢဝ်သႂ်ႇပၼ်ၶူဝ်းၶွင်ဢၼ်ဢမ်ႇၸႂ်ႈၶဝ်ႈၽၵ်း ဢၼ်ဢမ်ႇၸၢင်ႈၸိူမ်ႈ ၸၢင်ႈၸူဝ်ႇ ဢဝ်သႂ်ႇယုၵ်းယၵ်းၸိူဝ်းၼၼ်ႉၶႃႈ။

ပဵၼ်ထူင်ယၢင်ၸိူဝ်းလႂ်ၵေႃႈယဝ်ႉ ႁႂ်ႈလႆႈမေႃၸႂ်ႉတိုဝ်းထုၵ်ႇလၢႆးမၼ်း ပေႃးႁႂ်ႈလီတေႉထုၵ်ႇလီ ငိူင်ႉဝေႈယူႇ သင်ၸိူဝ်ႉဝႃႈဢမ်ႇၸႂ်ႉလႆႈၼၼ်ႉၶႅၼ်းလီ ၵူဝ်ၸပ်းတၢင်းပဵၼ်ၶဵၼ်သႃႇမၢၵ်ႇႁဵင်း ယွၼ်ႉမၼ်း။

ၶေႃႈလီၾၢင်ႉသတိ!!!!!

• ထူင်ၽလၢတ်ႉသတိၵ်ႉၸၢင်ႈၸပ်းၾႆးငၢႆႈ ယွၼ်ႉၼၼ်လႄႈမိူဝ်ႈပိူၼ်ႈတိုၵ်ႉႁဵတ်းဢွၵ်ႇ မႃးၼၼ်ႉ ပိူၼ်ႈၸႂ်ႉသၢၼ်မဵဝ်းဢၼ်ၸၼ်ၼွင်ႇဢမ်ႇပၼ်ၸပ်းၾႆးလႆႈငၢႆႈ သၢၼ်ၶေးမီး ဢၼ်ပိူၼ်ႈသႂ်ႇၼၼ်ႉပဵၼ်ၿြူဝ်းမိၼေးတဵတ်ႇလႄႈ ၶလေႃးရိၼေးတဵတ်ႇ သၢၼ်ၸိူဝ်း ၼႆႉပေႃးသင်ဝႃႈၾႆးမႆႈယဝ်ႉတေၸၢင်ႈယဵၼ်းပဵၼ်သၢၼ်ၻႆးဢွၵ်ႉသိၼ်း (dioxin) မဵဝ်းဢၼ်ၸၢင်ႈပဵၼ်သၢၼ်ၶဵၼ်သႃႇမၢၵ်ႇႁဵင်း၊
• သၢၼ်မဵတ်ႉသီဢၼ်မီးပႃးတင်းၸိုၼ်းလႄႈၶႅတ်ႉမဵမ်ႈ ပိူၼ်ႈဢဝ်သႂ်ႇလေႃးလူင်းၵႂႃႇ ႁႂ်ႈမဵတ်ႉၽလၢတ်ႉသတိၵ်ႉမီးဢွၵ်ႇမႃးလၢႆသီ သၢၼ်ၸိုၼ်းလႄႈၶႅတ်ႉမဵမ်ႈၸၢင်ႈၸိုမ်း ႁူဝ်ႈဢွၵ်ႇမႃးတီႈထူင်ၽလၢတ်ႉသတိၵ်ႉလႆႈ။

ထူင်ၽလၢတ်ႉသတိၵ်ႉႁဵတ်းႁႂ်ႈလူၵ်ႈႁွၼ်ႉမႆႈ ထူင်ၽလၢတ်ႉသတိၵ်ႉၼိုင်ႈဢၼ်တေၸႂ်ႉၶၢဝ်း ယၢမ်းယွႆႈႁိုင်တႃႇ 450 ပီႊ သင်ၸိူဝ်းဝႃႈဢဝ်ၵႂႃႇၽဝ်ၼႆၸိုင်တေလႆႈသၢၼ်လေႃးလေးႁႆးၻြူဝ်း ၶႃးၿွၼ်ႈ ႁဵတ်းႁႂ်ႈလူၵ်ႈႁဝ်းႁွၼ်ႉမႆႈ သင်ပဵၼ်လႆႈဢမ်ႇလီၸႂ်ႉထူင်ယၢင်ယဝ်ႈ ဢမ်ႇၼၼ်ၵေႃႈ ၸႂ်ႉသႃႉ ထူင်ဢၼ်ဢဝ်ၽႅၼ်ႇႁဵတ်းဢဝ် ဢဝ်တၢင်ႇၸိူဝ်ႉတၢင်ႇပိူင်ႁဵတ်းဢဝ်တေလီသုတ်း။

ႁႂ်ႈလႆႈယူႇလီလွတ်ႈၽေးၵၼ်သေၵမ်း။

ၶမ်းၸိင်ႇ လၢင်းၶိူဝ်း။