လၢႆးလူတ်းၼမ်ႉၼၵ်း (ၼမ်ႉၸင်ႈၸဝ်ႈၵဝ်ႇ)

"လၢႆးလူတ်းၼမ်ႉၼၵ်း (ၼမ်ႉၸင်ႈၸဝ်ႈၵဝ်ႇ)"

မႂ်ႇသုင်ၶႃႈ မိူဝ်ႈၼႆႉႁဝ်းၶႃႈမႃးတူင်ႉတၵ်ႉၵၼ် မီးလွင်ႈၾၢၵ်ႇတွၼ်ႈပၼ်ၵၼ်ဢိတ်းၼိုင်ႈ ယူဝ်တေၸၢင်ႈမီးၽွၼ်းလီယူႇ ပဵၼ်လွင်ႈ ပၢႆးယူႇလီၼၼ်ႉၵူၺ်းၶႃႈ။

လွင်ႈၼႆႉပဵၼ်တူဝ်ၶႃႈထူပ်း ယဝ်ႉၵေႃႈတိုၵ်ႉၸၢမ်းတူၺ်းယူႇမိူဝ်ႈလဵဝ်ၼႆႉယဝ်ႉ ပဵၼ်လၢႆးလူတ်းၼမ်ႉၼၵ်းၸဝ်ႈၵဝ်ႇႁႂ်ႈယွမ်လူင်း တၢင်းပီႁဝ်းလူတ်းယွမ်းတေႉတေႉ ဢမ်ႇလူဝ်ႇလႆႈၵႂႃႇသိုဝ်ႉၵိၼ်ယႃလူတ်းတၢင်းပီးဢၼ်ပိူၼ်ႈပိုၼ်ၶၢႆယူႇၼၼ်ႉ ၵမ်ႉတေၺႃး တူတ်ႈတၢမ်ႇမၼ်း မၢင်ၵေႃႉၵိၼ်ထၢၼ်ႈပေႃးတၢႆၵေႃႈမီး။

မိူဝ်ႈဢွၼ်တၢင်းၵေႃႈၶႃႈၵေႃႈပဵၼ်ၵေႃႉၼိုင်ႈဢၼ်ထူပ်းပၼ်ႁႃ ယူႇလီၵိၼ်ဝၢၼ်ပူၼ်ႉတီႈမၼ်းၼႃႇလႄႈ ၼမ်ႉၼၵ်းၶႃႈၼႆႉထိပ်ႇ ၶိုၼ်ႈသုင်ထိုင် 87 kg ၵိလူဝ်းၵြႅမ်းယဝ်ႈ ၶႃႈၵေႃႈႁႃလၢႆးလူတ်းမၼ်းမႃးႁိုင်ယဝ်ႉ ဢမ်ႇႁၼ်လၢႆးမၼ်းတေဢွင်ႇ ၼႃႇႁၢင်ႈလဵၼ်ႈ ႁႅင်းယူႇၵေႃႈမၼ်းဢမ်ႇလူတ်းယွမ်းလူင်းလႃးလႃး ယႃႇဝႃႈတေယွမ်းလူင်းသမ်ႉမေးထင်ႇၶိုၼ်ႈထႅင်ႈလႄႈ ဢဝ်တူၵ်းၸႂ်တေႉ တေႉယဝ်ႉ။

ၵမ်းၼၼ်ႉၵေႃႈၸင်ႇႁႃလၢႆးလဵပ်ႈႁဵၼ်းတူၺ်းလွင်ႈမၼ်းတေႉတေႉဝႃႈဝႃႈ ပေႃးႁူႉလၢႆးမၼ်းယဝ်ႉၵေႃႈၵျၢင်ႉၵမ်ၸွမ်း ပဵၼ်ဢၼ် ႁၢၼ်ႉၸႂ်တေႉတေႉ ၼမ်ႉၼၵ်းလူတ်းယွမ်းလူင်းၼမ်တေႉ လၢႆးၼႆႉဢမ်ႇလူဝ်ႇၵႂႃႇႁႃမေႃယႃ ဢမ်ႇလူဝ်ၵႂႃႇၸူးၵူၼ်းႁူႉတီႈလႂ် လၢႆးမၼ်းၼႆၵေႃႈႁႂ်ႈမေႃယူႇမေႃၵိၼ် ၸွမ်းၼင်ႇပေႃႈထဝ်ႈမႄႈမွၼ်ႇႁဝ်းဢွၼ်ပဵၼ်မႃးၼၼ်ႉယဝ်ႈ။
ၶႃႈတေဢမ်ႇလၢတ်ႈၼမ်ၵူဝ်လႆႈၶၢၼ်ႉႁေႃးၵၼ် ဢဝ်ႁူဝ်ႁုပ်ႈမၼ်းၶႃႈ။

ၼိုင်ႈ..... တေလႆႈၵမ်လွင်ႈၵိၼ်ၵိူဝ်ဝၢၼ် ဢမ်ႇဝႃႈတေဢဝ်မႃးသႂ်ႇၽၵ်း ၶဝ်ႈမုၼ်း ၶဝ်ႈပွင်းၵူႈမဵဝ်း ဢၼ်သႂ်ႇၼႂ်းၵႃႇၾီႇ ဢူဝ်း ဝၼ်းတိၼ်း ၵူဝ်းၵူဝ်ႈ ၼမ်ႉဝၢၼ်ၼမ်ႉၸဵမ်း ၼမ်ႉမၢၵ်ႇမႆႉမၢၵ်ႇတွၵ်ႇဢဝ်သႂ်ႇဢႅပ်ႇသႂ်ႇတဝ်ႈမႃးၶၢႆၼၼ်ႉ တေဢမ်ႇလႆႈၵိၼ်သေ မဵဝ်း သင်ဝႃႈတေၵိၼ်မၢၵ်ႇမႆႉၼႆၸိုင် ႁႂ်ႈလႆႈသိုဝ်ႉၵိၼ်ပဵၼ်ႁူၺ်ႇမၼ်း ပွၵ်ႇယဝ်ႉၵေႃႈႁႂ်ႈၵိၼ်ၵမ်းလဵဝ် မဝ်ႇလီပွၵ်ႇဝႆႉယဝ်ႉ ၵိၼ်ၵမ်းလိုၼ်း

သွင်ႇ..... တေလႆႈၵမ်လွင်ႈၵိၼ်ၼမ်ႉမၼ်းၼမ် မဵဝ်းဢၼ်ၶူဝ်ႈဢၼ်ၸေႃႇ ဢၼ်ဢုပ်ႉလႄႈဢၼ်ဢွင်ႇ တေလႆႈယွမ်းတေႉ တေႉယဝ်ႈ တွၼ်ႈတႃႇတူဝ်ၶႃႈတေႉ ၶႃႈယင်းတိုၵ်ႉၵိၼ်ယူႇ ၸိူင်ႉၼင်ႇၽၵ်းၵႅင်မၢင်ၸိူဝ်းဢဝ်ၶူဝ်ႈၼမ်ႉၽိတ်းမီႇၵီးမၼ်းယူႇ ၵူၺ်းၵႃႈၶႃႈတေဢမ်ႇၵိၼ်မဵဝ်းဢၼ်ၶူဝ်ႈဢဝ်ယူဝ်းယူဝ်း ၸိူင်ႉၼင်ႇၵႆႇၶူဝ်ႈ ၵူၺ်ႈၶူဝ်ႈ ၶၢင်ႇပွင်း ထူဝ်ႇၽူးသိင်ႉမဵဝ်းဢၼ် ၸႂ်ႉလၢႆးၶူဝ်ႈဢဝ်ၼၼ်ႉ ၶႃႈဝေႈမူတ်းယဝ်ႈ။

သၢမ်..... ႁႂ်ႈယူႇၵိၼ်ၼင်ႇၼူၵ်ႉ ပွင်ႇဝႃႈႁႂ်ႈလုၵ်ႉၸဝ်ႉ ယဝ်ႉၵေႃႈပေႃးလုၵ်ႉမႃးယဝ်ႉႁႂ်ႈလႆႈၵိၼ်ၵမ်းလဵဝ်တွၼ်ႈတႃႇၶႃႈတေႉ လုၵ်ႉမႃးယဝ်ႉၵေႃႈၶႃႈတေၵိၼ်ၵူၺ်ႈလၶႅင်ႇသွင်လုၵ်ႈၵမ်းလဵဝ် ယဝ်ႉၵေႃႈၵိၼ်ၼမ်ႉၸွမ်း ယဝ်ႉၵေႃႈ ႁႃႁဵတ်းၽၵ်းၵိၼ်ၶဝ်ႈ ၼႂ်ၵူႈၼႂ် (လွင်ႈၵိၼ်ၶဝ်ႈၼႂ်ၼႆႉၶႃႈႁဝ်းၵျၢင်ႉၽိတ်းမႃးၸဵမ်ပိုင်းမိူဝ်ႈၵူႈပွၵ်ႈတေႉယၢမ်ႈၵိၼ်ၶဝ်ႈၼႂ်ယူႇ ၵူၺ်းၵႃႈလၢႆပီမႃးၼႆႉ ဢမ်ႇၵိၼ်ၶဝ်ႈၼႂ်လႄႈ ၵၢင်ၼႂ်ႁႃၵိၼ်ၵႃႇၾီႇၵိၼ်ၶဝ်ႈမုၼ်းတိၵ်း မၼ်းပိူင်ႈလၢႆးမၼ်း မၼ်းယႃႉလၢႆးယွႆႈထူင်ၶဝ်ႈ) ႁိုင်ၵႂႃႇ ထူင်ၶဝ်ႈႁႅင်းဢူၼ်ႈၵႂႃႇတိၵ်းတိၵ်းသႂ်ႇသႂ်ႇမႃး လွင်ႈၽဝ်လၢၼ်ႇဢႁႃႇယဢမ်ႇလီ ၸပ်းတၢင်းပီးငၢႆႈ။

သီႇ..... ၵိၼ်ၼိုင်ႈတႃႇတေဝႆႉတႃႇၵိၼ်ၼမ်ႉၽွင်ႈ ယႃႇၵိၼ်ဢိမ်ႇတိူၵ်ႈ မိူဝ်ႈဢွၼ်တၢင်းၶႃႈၼႆႉၵိၼ်ၶဝ်ႈလူင်တေႉတေႉ ဝႃႈဝႃႈ ပေႃးၽၵ်းဝၢၼ်ၵိၼ်သွင်ဝၢၼ်ႇ မၢင်ပွၵ်ႈၽၵ်းထုၵ်ႇၸႂ်ၼႃႇဢႃးလႃး ၵိၼ်ၶဝ်ႈမူတ်းမေႃႈၵေႃႈမီး သင်ပဵၼ်လႆႈႁႂ်ႈ လူတ်းၶဝ်ႈလူင်းလိူဝ်ၵဝ်ႇ ႁႂ်ႈလႆႈၵိၼ်ၽၵ်းၼိူဝ်ႉ ပႃ ၽၵ်းယိူဝ်ႈၼၢင်းၶဵဝ်ၼမ်ၼမ် တွၼ်ႈတႃႇၶႃႈတေႉဝၢႆးလႆႈမႃးၵမ်ၵိၼ် ၸိူင်ႉၼႆ ၶႃႈၵိၼ်ၼမ်ႉၽိတ်း ၼွၵ်းၵပ်းၽၵ်းၵပ်းမၼ်းၼမ်မႃးလိူဝ်ၵဝ်ႇ။

ႁႃႈ..... ႁႂ်ႈႁႃၵိၼ်မဵဝ်းဢၼ်သူမ်ႈသူမ်ႈဝႆႉ ၸိူင်ႉၼင်ႇမၢၵ်ႇမႆႉသူမ်ႈၵူႈၸိူဝ်း ၽၵ်းၵေႃႈမဵဝ်းဢၼ်သူမ်ႈ ၸိူင်ႉၼင်ႇ ၽၵ်း ၸေႃး ၽၵ်းၵၢတ်ႇသူမ်ႈၸိူဝ်းၼႆႉ (လွင်ႈၼႆႉ ယွၼ်းၶွပ်ႇၸႂ်ထိုင် ပီႈၶမ်းမိူင်း မိူင်းပၼ်ႇၸိၸမ်ႈၼေမႃး ၶႃႈၵေႃႈယိပ်းတိုဝ်း ၸွမ်း သၢင်ႇထုၵ်ႇတေႉၶႃႈ။

ႁူၵ်း.... ႁႂ်ႈႁႃမိုဝ်ႉယၢမ်းတႃႇတေလဵၼ်ႈႁႅင်းၸွမ်း သင်ၸိူဝ်းဝႃႈၵေႃႉလႂ်ႁဵတ်း ၵၢၼ်ဢၼ်လႆႈၸႂ်ႉႁႅင်းၼမ်ၼႆၵေႃႈဢမ်ႇ တၢပ်ႈလဵၼ်ႈႁႅင်းၵေႃႈလႆႈ ၵူၺ်းၵႃႈၽႂ်ပဵၼ်မေႈႁိူၼ်း ဢမ်ႇလႆႈႁဵတ်းၵၢၼ်ၸႂ်ႉဢဵၼ်ႁႅင်းၼမ်ၼႆၵေႃႈ တေလႆႈႁႃၶၢဝ်း ယၢမ်းတႃႇလဵၼ်ႈႁႅင်းၼိုင်ႈပွၵ်ႈဢမ်ႇယွမ်းလိူဝ် 30 မိၼိတ်ႉ ၼိုင်ႈဝူင်ႈမွၵ်ႈသွင်သၢမ်ဝၼ်ၵေႃႉလႆႈ။

ၸဵတ်း..... တေလႆႈၼွၼ်းၸဝ်ႉဢိတ်းၼိုင်ႈ ယႃႇပေၼွၼ်းလိုၵ်းၽႅဝ် ပေႃးမီးၵၢၼ်ၵေႃႈတူၺ်းတူၺ်းႁေၼွၼ်းလႆႈယဝ်ႉ ယႃႇပေၵုမ်ႇလဵၼ်ႈၼႃႇၽႅဝ် ပေႃးႁဝ်းၼွၼ်းဢေႇမၼ်းတေယႃႇၾိင်ႈယူႇသဝ်းသၽဝတူဝ်ၶိင်းႁဝ်း။

ပႅတ်ႇ..... ၵေႃႉဢၼ်မၵ်ႉၸွႆးၵႃႇၾီႇၼႃႇပူၼ်ႉတီႈမၼ်းၼၼ်ႉၵေႃႈ ႁႂ်ႈလႆႈၵိၼ်ၼမ်ႉၼဵင်ႈတၢင်တႅၼ်းဢဝ်ၶႃႈ သင်ဝႃႈ ဢမ်ႇတၢင်လႆႈၼႆၵေႃႈႁႂ်ႈၶျေႃႉလွင်ႈသႂ်ႇၵႃႇၾီႇလူင်း ၶျေႃႉလွင်ႈသႂ်ႇၵိူဝ်ဝၢၼ်လူင်းပေႃးႁႂ်ႈမၼ်းလီ ဢမ်ႇလီၵိၼ် ၵႃႇၾီႇယဝ်ႉ။

ၸွမ်းၼင်ႇၶႃႈလႆႈႁဵတ်းမႃးၸွမ်းလၢႆးဢၼ်လၢတ်ႈမႃးၸိူဝ်းၼႆႉ ၼမ်ႉၼၵ်းၶႃႈလူတ်းလူင်းတေႉတေႉဝႃႈယဝ်ႉ မိူဝ်ႈဢွၼ် တၢင်းၶႃႈၼၵ်းဝႆႉ 87 kg ၵိလူဝ်း မိူဝ်ႈလဵဝ်လူတ်းယွမ်းလူင်းလိူဝ် 78.5 ယဝ်ႉၵေႃႈတေလူင်းတိၵ်းတိၵ်းယဝ်ႈ ၶူဝ်းလဵင်း ၸိူင်ႉၼင်ႇ ၵူၼ်ၼုင်ႈၼၼ်ႉ ႁူဝ်သၢႆဢႅဝ်လူမ်လူဝ်ႉလူဝ်ႉလႃႉလႃႉမူတ်းယဝ်ႈ။
ဢၼ်တႅမ်ႈမႃးၸိူဝ်းၼႆႉယုမ်ႇယမ်ဝႃႈတေၶဝ်ႈတၢင်းတိုဝ်းယူႇဢမ်ႇႁၢင်ႉ ပၢႆးယူႇလီႁဝ်းၵေႃႈတဵမ်ထူၼ်ႈ ၼႃႇႁၢင်ႈဝႃႈၵႂႃႇ လႂ်ပႆလႂ်ၵေႃႈပေႉလူမ်ၽိဝ်ႇလီၵေႃႈ ဢမ်ႇႁူႉ။
မႂ်ႇသုင်ၶႃႈ တီႈၸူမ်းႁေႃးဢၢၼ်ႇ။