လၢပ်ႈၶူမ်

ၼိူဝ်ႉသႃႈ ၼိူဝ်ႉလၢပ်ႈ ၵမ်ႈၼမ်ပေႃးဢုပ်ႇထိုင်လွင်ႈၼႆႉတိုၼ်းဝႃႈၵမ်ႈၼမ်ႁူႉၸၵ်း မၵ်ႉ ၵိၼ်ၵၼ်ယူႇ တေဝႃႈမၼ်းပဵၼ်ၾိင်ႈ ထုင်းႁဝ်းၼႆၵေႃႈၸႂ်ႈ တႆးႁဝ်းၵိၼ်ၼိူဝ်ႉသႃႈ ပီႈၼွင်ႉၵူၼ်းယူၼ်းၵိၼ်ၼိူဝ်ႉလၢပ်ႈ လၢႆးႁဵတ်းၼိူဝ်ႉသႃႈၵေႃႈဢမ်ႇမိူၼ်ၵၼ် တႆးႁဝ်းႁဵတ်းၼိူဝ်ႉသႃႈဢမ်ႇသႂ်ႇလိူတ်ႈ ၵျိူၵ်ႈၽၼ်ႉၼမ်ႉမၢၵ်ႇၽႃႈ သႂ်ႇမႂ်မၢၵ်ႇၵႃႇ မႆႉၶမ်ႉ သႂ်ႇၽၵ်းလၢႆမဵဝ်း ႁဵတ်းၼိူဝ်ႉသႃႈ ႁႅင်ႈႁႅင်ႈဝႆႉ ၵူၺ်းၵႃႈပီႈၼွင်ႉယူၼ်းၶိူဝ်းလဵဝ်ၵၼ်တၢင်းႁဝ်း ၵိၼ်ၼိူဝ်ႉသႃႈသႂ်ႇလိူတ်ႈလႅင်ၸၢင်းႁၢင်း သႂ်ႇလီ သႂ်ႇၽေႉမၼ်း ပေႃးၶူမ် မိူဝ်ႈၼႆႉၶႃႈတေမႃးတႅမ်ႈလၢႆးႁဵတ်းၼိူဝ်ႉသႃႈၶူမ် "လၢပ်ႈၶူမ်ၼေပၼ်" သင်ဝႃႈမၢင်ၵေႃႉသူင်မၵ်ႉယဝ်ႉဢမ်ႇႁူႉၸၵ်း လၢႆးႁဵတ်းမၼ်း တေလႆႈမေႃႁဵတ်းၵိၼ်ၵၼ် ၵူၺ်းၵႃႈမဵဝ်းၼိူဝ်ႉသႃႈလူဝ်ႇဝႆႉသတိ ၵူဝ်မၼ်းမီးမႅင်းတွင်ႉ။

ၵိရိယႃႇမၼ်း
ၼိူဝ်ႉဝူဝ်းပႃးၶူင်းၼႂ်းမၼ်း လူဝ်ႇလႆႈမီးပႃး လိူတ်ႈ ၼမ်ႉၽေႉ ၶူင်းၼႂ်းၸေးၸုင်ႇ ၶိူင်ႈထဵတ်ႈ "မၢၵ်ႇၶႅၼ်ႇ မၢၵ်ႇၽၵ်းၵီး ဢမ်ႇ ၼၼ်ၵေႃႈႁႃသိုဝ်ႉဢၼ်ပိူၼ်ႈႁဵတ်းၶၢႆပဵၼ်သွင်း 5 ၿၢတ်ႇ ၸိူဝ်းၼၼ်ႉၵေႃႈလႆႈ မၢၵ်ႇၽိတ်ႉႁႅင်ႈ မၢၵ်ႇၽိတ်ႉလိပ်း ၶႃးႁွမ် ၽၵ်းၽႆႇ ႁွမ်လူၼ်ႇ ၽၵ်းၵပ်းၵမ်ႈၵျိူၵ်ႈ။

လၢႆးႁဵတ်းမၼ်း
ၽၵ်ႉၼိူဝ်ႉဝူဝ်းႁႂ်ႈမၼ်းလႅဝ် သႂ်ႇလိူတ်ႈပႃးၵေႃႈလႆႈ ၶူဝ်ႇမၢၵ်ႇၽိတ်ႉႁႅင်ႈ ၶိူင်ႈထဵတ်ႈ ပေႃးဢမ်ႇမီးလႃးလႃး ဢဝ်မဵတ်ႉမၢၵ်ႇ ၽၵ်းၵီးတၢင်တႅၼ်းၵေႃႈလႆႈ ပေႃးၶူဝ်ႈယဝ်ႉၶိုၼ်းသႂ်ႇၶူၵ်ႉတမ်ဢွၼ်ႇဢွၼ်ႇ တမ်မၢၵ်ႇၽၵ်းၵီး ၶိူင်ႈထဵတ်ႈ မၢၵ်ႇၶႅၼ်ႇဢွၼ်တၢင်း သိုပ်ႇၼၼ်ႉၵေႃႈတမ်မၢၵ်ႇၽိတ်ႉဢၼ်ႁဝ်းၶူဝ်ႈၼၼ်ႉ တူမ်ႈၼမ်ႉၽေႉမၼ်းႁႂ်ႈသုၵ်း ၵူဝ်တွင်ႉၸဵပ်း တူမ်ႈၶူင်းၼႂ်းႁႂ်ႈမၼ်းသုၵ်း ၵူဝ်မႅင်းတွင်ႉ ၵူဝ်တွင်ႉၸဵပ်း သွႆးၶႃးႁွမ်ဝႆႉပဵၼ်ဝႅၼ်ႈပဵၼ်ဝႅၼ်ႈ သွႆးၽၵ်းၽႆႇ ႁွမ်လူၼ်ႇဝႆႉ

လၢႆးၽေႃႇမၼ်း
ငၢႆႈငၢႆႈၵူၺ်း ဢဝ်ၼိူဝ်ႉၽၵ်ႉ မၢၵ်ႇၽိတ်ႉ ၶိူင်ႈထဵတ်ႈ မၢၵ်ႇၶႅၼ်ႇတမ်ၸိူဝ်းၼၼ်ႉသႂ်ႇလေႃးၵၼ်ယဝ်ႉၵေႃႈၶူၼ်းႁႂ်ႈၶဝ်ႈၵၼ် ဢဝ်ၶူင်းၼႂ်းသႂ်ႇပႃး ၶႃးႁွမ်သွႆး ၽၵ်းၽႆႇႁွမ်လူၼ်ႇသွႆးသႂ်ႇၽွမ်ႉၵၼ်သဵင်ႈသဵင်ႈ သႂ်ႇပႃးၽၵ်းႁေႃသွႆးၵေႃႈၶႅမ်ႉလႅပ်ႈယူႇ ၵမ်းၼႆႉ လိုမ်းလၢတ်ႈထႅင်ႈမဵဝ်းၼိုင်ႈ ယႃႇသႂ်ႇၵိူဝ် ႁႂ်ႈဢဝ်ၼမ်ႉပႃသႂ်ႇတၢင်ၵိူဝ်ၶႃႈ မၼ်းၶႅမ်ႉလႅပ်ႈတႃႇလၢပ်ႈၶူမ်တေႉတေႉယဝ်ႈ ၶႃႈသႂ်ႇ ပႃးမၢၵ်ႇၽိတ်ႉလိပ်းၸွမ်း သႂ်ႇပႃးၽွင်ဝၢၼ်ႁႂ်ႈမၼ်းၶႅမ်ႉ တွၼ်ႈတႃႇႁႂ်ႈမၼ်းၶူမ်ၼၼ်ႉ သႂ်ႇၼမ်ႉၽေႉမၼ်းၵေႃႈလႆႈ ဢမ်ႇၼၼ် ႁႂ်ႈလီသုတ်း သႂ်ႇလီမၼ်းၶႃႈ တိုၼ်းဝႃႈၶူမ်ၶႅမ်ႉလႅပ်ႈၼႃႇ ။

ၵိၼ်ၵပ်းၽၵ်းၶႅဝ်းတွင်း ယွတ်ႇမၢၵ်ႇၵႃႇ မၢၵ်ႇမူင်ႈ ၽၵ်းၵပ်းလၢပ်ႈၵူးၸိူဝ်းၸိူဝ်းလႆႈၵမ်ႈၵျိူၵ်ႈၶႃႈ ယႃႇလိုမ်းႁွင်ႉဢူၺ်းၵေႃႉမႃး ၵိၼ်ၸွမ်း။