ၽွၼ်းၸႃႉလွင်ႈၵိၼ်ၵႃႇၾီႇ

မိူဝ်ႈၼႆႉၶႃႈႁဝ်းတေမႃးတႅမ်ႈတၢင်ႇပၼ်ၽွၼ်းၸႃႉလွင်ႈၵိၼ်ၵႃႇၾီႇ ယွၼ်းၶေတူဝ်ဝႆႉဢွၼ်တၢင်း လွင်ႈတႅမ်ႈတၢင်ႇၽွၼ်းၸႃႉလွင်ႈၵိၼ်ၵႃႇၾီႇၼႆႉ ဢမ်ႇမီးသၢၵ်ႈသေႇ ဢမ်ႇၼၼ်မီးလွင်ႈလဵပ်ႈႁဵၼ်းပၢႆးႁူႉလွင်ႈၵႃႇၾီႇတီႈလႂ် ၽႂ်ဢမ်ႇယိုၼ်ယၼ် ၵူၺ်းၵႃႈမၼ်းပဵၼ်လၢႆးထတ်းသၢင်ဢဝ်ၼႂ်းတူဝ်ၼႂ်းၸႂ်ႁင်းၵူၺ်း ပေႃးၽိတ်းၵေႃႈပဵၼ်တၢင်းၽိတ်းသုၼ်ႇတူၺ်းၵူၺ်း ၽွၼ်းၸႃႉမီးၸိူင်ႉႁိုဝ်ၽွင်ႈ။

ၶေႃႈၼိုင်ႈ ၽွၼ်းၸႃႉလွင်ႈပၢႆးယူႇလီ
     >> ၵိၼ်ယဝ်ႉႁဵတ်းႁႂ်ႈၼွၼ်းမဝ်ႇလပ်း ၼွၼ်းဢမ်ႇဢိမ်ႇ ၵိၼ်ၵႃႈႁိုဝ်ၵေႃႈမိူၼ်ႁၢင်ႈဢမ်ႇတိူဝ်ႉယိၼ်ႉမၼ်း
     >> ၵိၼ်ယဝ်ႉတွင်ႉၵႂ်ႈ တွင်ႉပွင်း တွင်ႉသတ်ႉ ထူၺ်ႈၸႂ်ၵႅၼ်း
     >> ၵိၼ်ယဝ်ႉထႆႇဢွၵ်ႇပႅတ်ႈယၢပ်ႇ ၵွပ်ႈဝႃႈၵႃႇၾီႇၼၼ်ႉမၼ်းၶူမ် ၽၢတ်ႇလႄႈ ၸင်ႇဝႃႈမိူဝ်ႈႁဝ်းထႆႇပႅတ်ႈၼၼ်ႉ ႁၢင်ႈဝူၺ်ႇမိူၼ်မူၼ်းမူၼ်းဝႆႉ လၢဝ်ႈလၢဝ်ႈဝႆႉ ပဵၼ်ပိတ်းပဵၼ်ပွတ်း ထႆႇယဝ်ႉမိူၼ်ဢမ်ႇထႆႇ ဢၢပ်ႈတေၶၢင်ႉၶမ်ဝႆႉၸွမ်းသႆႈဝႆႉၵေႃႈလူဝ်လူဝ်

ၶေႃႈသွင် ၽွၼ်းၸႃႉလွင်ႈပၢႆးထၢတ်ႈၸႂ်
     >> ယူႇတီႈလႂ်ၵေႃႈၶုၵ်ႉဝူၼ်ႉလွင်ႈႁႃၵိၼ်ၵႃႇၾီႇ ပေႃးဢမ်ႇလႆႈၵိၼ်ၸႂ်သုၵ်ႉသၵ်ႉမိူၼ်ႁၢင်ႈတေဢမ်ႇယဝ်ႉ။
     >> သုမ်းၶၢဝ်းယၢမ်းတႃႇတေႁႃၵိၼ်ၵႃႇၾီႇ ၸွင်ႇမီးဝႆႉယူႇႁိုဝ်တီႈႁိူၼ်း တီႈၼၼ်ႈၶၢႆယူႇႁိုဝ် တီႈၼႆႉၶၢႆယူႇႁိုဝ်။
   
ၶေႃႈသၢမ် ၽွၼ်းၸႃႇလွင်ႈပၢႆးမၢၵ်ႈမီး
     >> ပေႃးၼပ်ႉသွၼ်ႇတေႉဢမ်ႇၼမ်လူင်လၢင် ၼိုင်ႈသွင်းၵႃႈၶၼ် 3-5 bath ၵႃႈမႃးဢိတ်းၼိုင်ႈၵေႃႈ 10 bath ပေႃးဢၼ်ၵႃႈယႂ်ႇတေႉတေႉၼိုင်ႈၵွၵ်း 50 - 60 လူးၵွၼ်ႇ ၼိုင်ႈလိူၼ်မူတ်းငိုၼ်းၵႃႈႁိုဝ် ၼိုင်ႈပီမူတ်းငိုၼ်းၵႃႈႁိုဝ် ဝူၼ်ႉသွၼ်ႇၵၼ်ဢဝ်။

ႁၼ်ၽွၼ်းၸႃႉမီးၸိူင်ႉၼႆ တေလႆႈၽျႅတ်ႈယူႇၶႃႈယူဝ်ႉ။

မႂ်ႇသုင်ၶႃႈ။